Махаббат – ерекше сезім. Сіз өз қиялыңызда жоспар құрып, армандағы ханзадаңызды қалай күтіп жүрсеңіз де тағдыр сізге мүлде басқа тосынсый дайындауы мүмкін. Әрине, әрбір қарым-қатынас басқаша басталып, әр түрлі дамиды. Алайда, ғалымдар махаббаттың барлық жұптар басынан өткізетін бес кезеңін белгіледі.
Ес-түссіз ғашықтық
Жұптық қарым-қатынастың – ең алғашқы ең тәтті кезеңі. Өміріңізде енді пайда болған адаммен ғажайып сезімді бөлісу, таусылмайтын әңгімелер, тамаша тосынсыйлар, бір сөзбен айтқанда ессіз ғашық болу кезеңі. Бұл кезеңде жұбыңыздың бойындағы кемшіліктерді мүлде байқамайсыз, ол бойына тек жақсы қасиеттерді жинаған мінсіз адам болып көрінеді. Ол қалай сөйлесе де, қалай киінсе де сізге бәрі ұнайды. Бірақ, бұл алдамшы сезім махаббатың екінші кезеңі басталғанда аяқталады.
Даму
Біз махаббаты мойындаған сәтте – мойнымызға жауапкершілік аламыз. Жұбыңызбен екінші кезеңге сәтті өте алсаңыз, арадағы сезім шынайы деген сөз. Сіздер енді бірге болашаққа жоспар құра бастайсыздар, бір-біріңізге толықтай сенесіздер, бірге өсіп, дамисыздар. Дәл осы кезеңде көптеген жұптар бірге тұруға немесе үйленуге шешім қабылдайды. Егер дәл осы адаммен өмір бойы бірге бола алатыныңызға сенсеңіз үшінші кезеңге өтесіздер.
Салқындау
Жұбыңыздан көңіліңіз қалып, араларыңызда салқындық пайда болады. Көптеген жұптар дәл осы кезеңнен өте алмай айырылысып кетіп жатады. Кенеттен жұбыңызға бұрынғыдай ғашық емес сияқты, ал сіздердің болашаққа құрған жоспарларыңыз бос сөз секілді болып көрінуі мүмкін. Қарым-қатынастың бұрынғыдай қуаныш сезімін сыйлай алмайтынын түсінесіз, бірақ себебін таппай дал боласыз. Содан ұрысуға себеп іздей бастайсыз, ал бұндай кезде түймедей нәрсе түйедей болып көрінуі мүмкін. Үшінші кезеңде әрбір адам өзіне «Мен дұрыс таңдау жасадым ба?» деген сұрақ қояды. Абыржымаңыз, бұл – өтпелі.
Жұмыс
Қарым-қатынасты үшінші кезеңнен ойыңызды өзгерту арқылы ғана құтқара аласыз. Өзіңізбен, қарым-қатынаспен жұмыс жасау арқылы ересек махаббатқа қол жеткізе аласыз. Ешкім мінсіз емес: барлық адамның кемшілігі бар. Сондықтан жұбыңызды кемшіліктерімен қабылдауға тырысыңыз. Ия, қарым-қатынас – жұмыс, сондықтан нағыз махаббатқа қол жеткізу үшін шыдаммен әрекет ете білеу керек.
Нағыз махаббат
Күнделікті мәселелерді жалғыз шешу мүмкін емес, сондықтар адамдар өзіне жұп іздейді. Бірақ сіздің барлық талаптарыңызға сай, мінсіз адамды бірден табу мүмкін емес. Сондықтан кейде адамды жай ғана қабылдауға, көз жұмуға тура келеді. Осы кезеңдердің барлығын қол ұстасып бірге өткеннен кейін нағыз өмірлік махабатыңызды тапқаныңызға сенімді боласыз. Енді сіздер ала алмайтын асу жоқ!
